संताली होड़ साँवहेंतरे कुदुम : मित् तो़जबिज

नोआ धारती रे आयमा लेकान मानवाँ जो़तो़ कोवाक् गे गोगो-पा़रसी मेनाक् ताको। गोगो-पा़रसी मेनाक् खा़न साँवहेंत् हों मेनाक् ताकोआ। साँवहेंत् मेनाक् खा़न आको सोमाज रे जो़तो़ मेनाक् गेया। होड़ होपोन दो़ सेदायजुग खो़न गे सिरजोन सोंङ्गे आ़डी गा़हिर जोनोड़ाव मेनाक् कोआ। होड़ होपोन गे संताल कानाको। संताल कोवाक् दो़ संताली पा़रसी काना। संताली दो़ ऑस्ट्रिक पा़रसी घारो़ंज रेयाक् आसो़ल पा़रसी काना, जाहाँ दो़ 22 दिसम्बर 2003 सेरमा हिला़क् लोकसभा रे पारित आकाना, 23 दिसम्बर 2003 सेरमा हिला़क् दो़ राज्यसभा रे पारित आकान आर 07 जनवरी 2004 सेरमा हिला़क् दो़ भारत रेन उन ओकते रे दिसो़म गोङके मानोतान डॉ. ए. पी. जे. अब्दुल कलाम आक् आँगो़च् तायो़म 08 जनवरी 2004 सेरमा हिला़क् गजट रे उछा़न लेना। भारतीय संविधान रेयाक् 92वें संशोधन लेकाते 8वीं अनुसूची रे सेलेत् आकाना। सेदायजुग रेयाक् संताली होड़ साँवहेंत् रेदो़ हिजुक् काना :- होड़ सेरेञ, होड़ का़हनी, होड़गाथा, होड़ खिलोड़, होड़ एनेच्, कुदुम, भेन्‍ताकाथा, ला़ईआगु काथा, बाँखेंड़, बिनती आर बोङ्गा ञुतुम एमान तेयाक् को़। ओनाको़ मुद खो़न संताली कुदुम दो़ होड़ होपोनाक् जियो़न रेयाक् आ़डी माराङ हिसा़ काना। संताली होड़ साँवहेंत् रे कुदुम रेयाक् दो़ माराङ मोहोत् मेनाक्आ। संताली रोड़ गिदरा़ दो़ कुदुम हो़तेते आपनाराक् पा़रसी रेयाक् उकु काथा कोको हुदिस गाण्डो़न दाड़ेयाक्आ। नोआ दो़ कुसी-रा़सका़ से आ़किल गेयान हामेट रेयाक् हों आ़डी माराङ ठाँव काना ’‘कुदुम’‘ दो़। गिदरा़ बुला़व साँव-साँवते दिसा़ हेवाक् रेयाक् भागे उपा़य काना। कुदुम रेयाक् जो़बाब ञुम ञुमते गिदरा़ को़वाक् बोहोक् हाताङ लासेरो़क् काना। स्कूल ओड़ाक् रे चेत् लेका आ़किल-गेयान ञामो़क् काना ओङका गे कुदुम हो़तेते हों आतो कुलही पिण्डा़ रे आयुप् सोमोय दुडुप् काते गिदरा़को तालारे कुदुम हो़तेते आ़किल-गेयान दिसा़ दाड़े होयोक् काना।